ایک جملہ جو ہم سب بولتے ہیں....ایک بات جو سب کی زندگیوں کا روگ بنی ہوئی ہے....
*کیا کہیں گے لوگ*.....
کون لوگ؟؟؟
آپ....
جی ہاں آپ...جو پڑھ رہے ہیں!!
میں...جو لکھ رہی ہوں....
ہم سب....ہمی تو ہیں وہ *لوگ* جن سے ہم تنگ ہیں....
ایک دوسرے کی زندگیوں میں بے جا مداخلت....نکتہ چینی....تجسس...غلط گمان....غیر ضروری تبصرے....
کہیں کسی اور سیارے سے نہیں آتی یہ "لوگ" نامی مخلوق....یہیں کی ہے....آپ اور میں....ہم سب....
پھر شکوہ کیسا اور شکایت کس سے....🤔
قرآن جو زندگی کی کتاب ہے....اپنے مخاطب کو صاف الفاظ میں سکھاتی ہے..."ولا تجسسو"....
(اور ٹوہ میں نہ رہو)
اور پھر....
"اجتنبو کثیرا من الظن. ان بعض الظن اثم"
بہت زیادہ گمان نہ کرو...کہ بعض گمان گناہ ہوتے ہیں.
(سورت حجرات)
یقین کیجیے اس مسئلے کا صرف اسی صورت سدِ باب کیا جاسکتا ہے...اگر ہم "کیا کہیں گے لوگ" کہتے ہوئے آئینے میں جھانک لیں!
آپ کی ایک غلط بیانی کسی کی زندگی بھر کی پریشانی بن سکتی ہے...آپ کا ایک بے تکا اندازہ کسی کو ہیرو سے ولن بنا سکتا ہے....آپ کا ایک غیر تصدیق شدہ جملہ بہتان بن سکتا ہے....
کسی بادشاہ کے دربار میں ایک درباری بھاگتا آیا اور بھرے دربار میں بولا...بادشاہ سلامت آپ کی بیٹی چلی گئی ہے...
بادشاہ نے سر جھکا لیا....
لوگ اٹھ کے چلے گئے تو جملہ مکمل ہوا...اپنے شوہر کے ساتھ...
مگر اب کیا....بھرے مجمع نے تو کچھ کا کچھ سنا...اور پھر خود سے نتیجہ بھی اخذ کر لیا....!!
بولیں...تو بولنے سے پہلے بات کو تول لیں...ورنہ بات آپ کو بے مول کردے گی!!
سیماب عارف
ایڈیٹر ای-میگزین اور رہبر پازیٹو پاکستان
No comments:
Post a Comment